माळशिरस पंचायत समितीचा ‘आदर्श मुख्याध्यापक’ पुरस्कार जाहीर; युन्नूस तांबोळी सरांचा सन्मान
Talk18 मराठी l आण्णा भोसले
माळशिरस तालुक्यातील शिक्षण क्षेत्रासाठी अभिमानाची बातमी समोर आली आहे. माळशिरस पंचायत समितीचा मानाचा ‘आदर्श मुख्याध्यापक’ पुरस्कार यावर्षी श्री. युन्नूस तांबोळी सर यांना जाहीर करण्यात आला आहे. त्यांच्या या निवडीमुळे संपूर्ण शैक्षणिक वर्तुळात आनंदाचे वातावरण निर्माण झाले असून, विविध स्तरातून त्यांच्यावर अभिनंदनाचा वर्षाव होत आहे.
सध्या ते जिल्हा परिषद मुलींची शाळा, वेळापूर येथे मुख्याध्यापक म्हणून कार्यरत आहेत. आपल्या प्रदीर्घ सेवाकाळात त्यांनी विद्यार्थ्यांच्या सर्वांगीण विकासासाठी सातत्याने कार्य केले आहे. शाळेची गुणवत्ता उंचावण्यासाठी त्यांनी घेतलेले परिश्रम, राबवलेले नाविन्यपूर्ण उपक्रम आणि शिस्तबद्ध नियोजन यामुळे त्यांनी एक आदर्श मुख्याध्यापक म्हणून स्वतःची वेगळी ओळख निर्माण केली आहे.
नुकताच त्यांनी महिला दिनाचे औचित्य साधत कर्तृत्ववान महिलांचा सन्मान आणि महिलांच्या आरोग्याविषयी जनजागृती करणारा स्तुत्य उपक्रम राबवला होता. या कार्यक्रमामुळे समाजात महिलांविषयी आदरभाव अधिक दृढ झाला, तसेच आरोग्याबाबत जागरूकता वाढीस लागली. स्थानिक स्तरावर या उपक्रमाचे मोठ्या प्रमाणावर कौतुक करण्यात आले.
‘चिरतरुण मुख्याध्यापक’ म्हणून ओळखल्या जाणाऱ्या तांबोळी सरांनी विद्यार्थ्यांच्या शैक्षणिक प्रगतीसोबतच त्यांच्या व्यक्तिमत्त्व विकासावरही विशेष भर दिला आहे. त्यांच्या कर्तव्यनिष्ठा, प्रामाणिकपणा आणि शिक्षण क्षेत्रातील उल्लेखनीय योगदानाची दखल घेत प्रशासनाने त्यांची या प्रतिष्ठेच्या पुरस्कारासाठी निवड केली आहे.
या उल्लेखनीय यशाबद्दल सहकारी शिक्षक, शिक्षणप्रेमी तसेच विविध क्षेत्रातील मान्यवरांकडून त्यांचे मनःपूर्वक अभिनंदन करण्यात येत आहे.
