आमदार उत्तमराव जानकर यांच्या हस्ते पै. हर्षल सावंतचा सन्मान; ‘भैरवनाथ केसरी’ गदा जिंकत उल्लेखनीय यश
Talk18 मराठी प्रतिनिधी :
दसुर (ता. माळशिरस) येथील होतकरू पैलवान हर्षल विठ्ठल सावंत याने पुणे येथे पार पडलेल्या प्रतिष्ठेच्या भैरवनाथ केसरी कुस्ती स्पर्धेत गदा पटकावत उल्लेखनीय यश संपादन केले आहे. अत्यंत कठीण आणि आव्हानात्मक प्रतिस्पर्ध्यांना नमवत त्याने ही मानाची गदा जिंकली असून, या यशामुळे संपूर्ण माळशिरस तालुक्याचा मान उंचावला आहे.
हर्षलचा हा प्रवास सोपा नव्हता. अत्यंत प्रतिकूल आर्थिक परिस्थितीतून त्याने कुस्ती क्षेत्रात आपली वाट तयार केली. मर्यादित साधनसामग्री, अपुरी सोय आणि अनेक अडचणींचा सामना करत त्याने आपली जिद्द, मेहनत आणि चिकाटी कायम ठेवली. त्याच्या आई-वडिलांनीही कठीण परिस्थितीतून त्याला साथ देत त्याच्या स्वप्नांना बळ दिले. त्यांच्या त्याग आणि हर्षलच्या अथक परिश्रमामुळेच आज तो कुस्तीच्या मैदानात मोठं नाव कमावत आहे.
या दैदिप्यमान यशाबद्दल माळशिरस तालुक्याचे आमदार मा. श्री. उत्तमराव जानकर साहेब यांच्या हस्ते हर्षल सावंत याचा सन्मान व सत्कार करण्यात आला. यावेळी आमदार जानकर यांनी हर्षलच्या जिद्दीचे आणि कर्तृत्वाचे कौतुक करत, “अशा खेळाडूंमुळे तालुक्याचा गौरव वाढतो. पुढील काळातही मोठ्या स्पर्धांमध्ये यश मिळवून राज्य आणि देशाच्या पातळीवर नाव कमवावे,” असा विश्वास व्यक्त केला.
सत्कार समारंभाला परिसरातील मान्यवर, क्रीडाप्रेमी आणि ग्रामस्थ मोठ्या संख्येने उपस्थित होते. सर्वांनी हर्षलचे कौतुक करत त्याच्या पुढील वाटचालीस शुभेच्छा दिल्या. गावातील तरुणांसाठी हर्षल सावंत हा एक प्रेरणादायी आदर्श ठरत असून, त्याच्या यशामुळे कुस्ती क्षेत्राकडे नव्या पिढीचा कल वाढताना दिसत आहे.
