मुंबई | दि. २५ जून
शिवसेना (शिंदे गट) चे खासदार संजय दिना पाटील यांनी एका पत्रकाराबाबत केलेल्या कथित अपमानास्पद वक्तव्याचा व्हॉईस ऑफ मीडिया – इंटरनॅशनल फोरमने तीव्र शब्दांत निषेध व्यक्त केला आहे. या प्रकरणाची गंभीर दखल घेऊन तातडीने हस्तक्षेप करावा, अशी मागणी मुख्यमंत्री देवेंद्र फडणवीस यांच्याकडे निवेदनाद्वारे करण्यात आली आहे.
व्हॉईस ऑफ मीडिया – इंटरनॅशनल फोरमचे संस्थापक तथा आंतरराष्ट्रीय अध्यक्ष संदीप काळे यांच्या स्वाक्षरीने पाठविण्यात आलेल्या निवेदनात पत्रकार हे लोकशाहीचे चौथे स्तंभ असून शासन, प्रशासन आणि जनतेमधील महत्त्वाचा संवादाचा दुवा असल्याचे नमूद करण्यात आले आहे. अशा परिस्थितीत लोकप्रतिनिधींनी पत्रकारांविषयी अवमानकारक भाषा वापरणे हे लोकशाही मूल्यांना धरून नसल्याचे संघटनेने स्पष्ट केले आहे.
निवेदनात म्हटले आहे की, पत्रकारांना प्रश्न विचारण्याचा, माहिती जाणून घेण्याचा आणि जनतेसमोर वस्तुस्थिती मांडण्याचा घटनात्मक अधिकार आहे. आपल्या व्यावसायिक जबाबदाऱ्या पार पाडणाऱ्या पत्रकारांविषयी अपमानास्पद शब्दप्रयोग करणे किंवा त्यांना लक्ष्य करणे हे मुक्त आणि निर्भय पत्रकारितेसाठी धोकादायक ठरू शकते.
एखाद्या बातमीबाबत किंवा प्रश्नाबाबत मतभेद असू शकतात; मात्र त्यासाठी पत्रकारांचा अपमान करणे किंवा त्यांची प्रतिष्ठा कमी करण्याचा प्रयत्न करणे कोणत्याही लोकशाही व्यवस्थेत स्वीकारार्ह नसल्याचे व्हॉईस ऑफ मीडियाने स्पष्ट केले आहे. अशा प्रकारच्या विधानांमुळे पत्रकारांच्या सुरक्षिततेबाबत चिंता निर्माण होऊ शकते तसेच समाजात चुकीचा संदेश जाऊ शकतो, असेही संघटनेने म्हटले आहे.
मुख्यमंत्री देवेंद्र फडणवीस यांनी या प्रकरणाची गांभीर्याने दखल घेऊन संबंधित खासदारांकडून सार्वजनिक दिलगिरी व्यक्त करण्यास सांगावे तसेच पत्रकारांचा सन्मान आणि सुरक्षितता अबाधित राहील यासाठी शासनाने स्पष्ट भूमिका घ्यावी, अशी मागणी निवेदनाद्वारे करण्यात आली आहे.
संदीप काळे यांनी सांगितले की, महाराष्ट्राला पुरोगामी विचारांची आणि मुक्त अभिव्यक्तीची समृद्ध परंपरा लाभली आहे. पत्रकारितेचा सन्मान राखणे ही लोकशाहीची मूलभूत गरज असून पत्रकारांवर होणारे शाब्दिक हल्ले, धमक्या आणि अवमान याविरोधात सर्व स्तरांवर ठाम भूमिका घेणे आवश्यक आहे.
दरम्यान, या निवेदनाच्या प्रती राज्य शासनातील वरिष्ठ अधिकारी, माहिती व जनसंपर्क महासंचालनालय, पोलीस महासंचालक तसेच संबंधित पक्ष नेतृत्वालाही पाठविण्यात आल्याची माहिती व्हॉईस ऑफ मीडिया – इंटरनॅशनल फोरमच्या वतीने देण्यात आली.
पत्रकारांचा सन्मान आणि अभिव्यक्ती स्वातंत्र्य अबाधित ठेवण्यासाठी शासनाने या प्रकरणात त्वरित व ठोस पावले उचलावीत, अशी अपेक्षा पत्रकार संघटनांकडून व्यक्त होत आहे.
